Shefi i NATO-s, Jens Stoltenberg ka mbajtur një konferencë për gazetarët pas përfundimit të mbledhjes së jashtëzakonshme me ministrat e Jashtëm të vendeve aleate.
Stoltenberg sqaron edhe njëherë pozicionin e NATO-s dhe thekson se nuk do ndërhyjë në Ukrainë, sepse nëse do ta bënte atëherë bota do të hynte në luftën e tretë.
“Është një marrëveshje e gjerë që duhet të bëjmë më shumë për vendet aleate, për të forcuar vendet e tyre dhe të shtojmë aktivitetet për t’i mbështetur. Në Ukrainë ata janë në rrezik për një agresion të mëtejshëm nga federata dhe forcat ruse. Aleatët e NATO-s i sigurojnë mbështetje Ukrainës, e kemi bërë këtë për shumë vite. Kemi ofruar lloje të ndryshme mbështetje dhe kjo është thelbësore në këto kohë kritike për to. Sa i përket zonës së fluturimit, aleatët kanë rënë dakord se nuk duhet të ketë avionë të NATO-s që operojnë në hapësirën e Ukrainës apo trupa që shkojnë në territorin e saj. Sulmet ndaj zonave nukleare natën e kaluar nënvizojnë se sa e rrezikshme është kjo luftë. Lufta në këto zona është e rrezikshme. I bëjmë thirrje Putinit ta ndalojë këtë luftë dhe të përfshihet në përpjekje diplomatike me dialog të ndërsjelltë. Ky ishte mesazhi i ministrave sot. Ajo që kemi parë është se Presidenti Putin nënvlerësoi forcën e ushtarëve ukrainas, për të ndaluar avancimin e forcave ruse. Kjo ishte falë kurajos së lidershipit, popullit dhe ushtarëve ukrainas. Ne i kemi ndihmuar ata, sepse aleatët e NATO-s i kanë trajnuar dhe pajisur me armë. Turqia ka siguruar pajisje, ndihmë ushtarake dhe kemi trajnuar dhjetëra mijëra forca ukrainase. Ata janë në vijën e parë të luftës. Po rrisim mbështetjen tonë me më shumë pajisje. Duke krahasuar se ku ka qenë ushtria ukrainase në 2014-ën, pajisjet e dërguara dhe trajnimet e ka bërë ushtrinë shumë herë më të fortë, kjo është arsyeja që ata janë të aftë të rezistojnë.
I kemi thënë Putinit se nëse pushton Ukrainën do të ketë kosto të mëdha. Këto kanë efekte afatgjata dhe shfaqen me kohën. Ne po i ofrojmë mbështetje Ukrainës dhe kemi arritur të bëjmë të gjitha kombet, në OKB, që t’i kërkojnë Rusisë të ulen në negociata. Duhet gjetur një zgjidhje. Duhet marrëveshje për korridoret humanitare. Kemi pasur një takim me ministrat e Jashtëm të NATO-s. E kemi përsëritur se do të mbështesim Ukrainën, do të ofrojmë mbështetje, e nuk do të jemi pjesë e konfliktit. Unë e ndava këtë mesazh, sepse besoj që nëse NATO përfshihet direkt, do të shohim më shumë vuajtje njerëzore, më shumë civilë të vrarë. Ne duhet të mbrojmë njrëzit që ndodhen në vendet aleate. Ne kemi pasur informacione prej muajsh për këtë që po ndodhte. Kemi paralajmëruar se Rusia po grumbullonte më shumë trupa në kufij për të pushtuar Ukrainën. Presidenti Putin vendosi të mos gjente një gjuhë diplomatike, por të pushtonte. Ne jemi për zgjidhje politike, në një kohë që Rusia ka zgjedhur forcën ushtarake për të goditur një shtet të pavarur në Evropë. Ne duam që Rusia të mos vrasë, të luftojë e pushtojë, siç jemi duke e parë, por të gjendet një zgjidhje. Ne kemi një zyrë në Kiev, u angazhuam për të forcuar logjistikën, pjesën kibernetike, kemi rritur aftësinë detare. Kemi dhënë ndihmë të madhe për Ukrainën dhe jemi ende duke e bërë”, tha Stoltenberg.