Banorët e rrezikuar nga zjarret në Gjirokatër do evakuohen dhe dërgohen në hotele
E Mërkurë 4 Gusht 2021, 08:11
TiranaPost
Një nga vatrat e zjarrit në Gjirokastër rrezikoi fatale për një të moshuar që flakët i hynë deri në shtëpi.
Në një status ngushëllues për familjen e viktimës, kryebashkiaku i Gjirokastrës Flamur Golemi shkruan se është i nevojshëm evakuimi i gjithë banorëve që janë të rrezikuar nga këto vatra. Sipas Golemit, ata do të akomodohen në hotele dhe shpenzimet do t`i mbulojë bashkia.
“E pazakontë ajo që po ndodh në Gjirokastër, ku për fat të keq patëm edhe humbje në jetë njerëzore. Shpreh ngushëllimet për familjen Haxhiaj, që duhet të gjejë kurajo për të përballuar dhimbjen e thellë. Ndërkohë përsëris apelin për banorët e fshatrave që rrezikojnë nga flakët, të bashkëpunojnë me ekipet e emergjencave civile për t’u evakuuar.
S’ka asgjë më të shtrenjtë sesa jeta. Nuk duhet neglizhuar rreziku që kanoset nga flakët. Bashkia Gjirokastër do të marrë përsipër akomodimin e përkohshëm të familjeve të evakuuara derisa të normalizohet kjo situatë. Të gjitha strukturat janë në terren për të bërë gjithçka munden për shuarjen e zjarrit. Rikujtoj autoritetet e tjera shtetërore t’i shkojnë deri në fund ndëshkimit për këdo që ka përgjegjësi për zjarrvëniet. Ata që luajnë me zjarrin, meritojnë të ndëshkohen me të gjithë ashpërsinë e ligjit”, shkruan Golemi.
