Doktor Fauci i përgjigjet ofendimit ‘je idiot’ të Donald Trump
E Martë 20 Tetor 2020, 19:27
TiranaPost
Ofendimit të Presidenti Donald Trump, doktori i njohur në Amerikë, Anthony Fauci, iu përgjigj me qetësi dhe më një shembull nga filmi i famshëm ‘Kumbari’.
“Unë përqendrohem totalisht te shëndeti dhe mirëqenia e njerëzve të vendit tim. Jam përkushtuar në këtë gjë përgjatë 50 viteve të karrierës sime. Vetëm kjo gjë më intereson. Gjërat e tjera janë si te filmi ‘Kumbari”: ‘Asgjë personale, thjesht biznes’. Unë dua vetëm të bëj punën time dhe të kujdesem për popullin. Kaq dua unë”, u shpreh Fauci, kur u pyet nga KNX Radio.
Kjo deklaratë erdhi pasi një ditë më parë Presidenti i SHBA-ve Donald Trump bëri komente pas një bisede telefonike me stafin e fushatës kundër Biden, kur tha:
“Njerëzit janë lodhur duke dëgjuar Faucin dhe të gjithë këta idiotë, të gjithë këta idiotë që e kuptuan gabim. Sa herë që Fauci del në televizion gjithmonë ka një bombë për të plasur. Ai mund të jetë një njeri i mirë, por i prapambetur. Ai ka qenë këtu në këtë pozicion për 500 vjet”.
Fauci është një nëpunës civil i cili sipas ligjit, nuk mund të pushohet drejtpërdrejt nga presidenti. Ai mund të apelojë çdo shkarkim të urdhëruar nga presidenti përmes të emëruarve politikë që e mbikëqyrin atë.
