Abi Bank përballë “gazetarisë gjobëvënëse” dhe një sqarim
Monday 15 June 2026, 11:59
TiranaPost
Sot në mëngjes, portali JOQ publikoi një shkrim ku pretendohej se ABI Bank zotëron mijëra hektarë tokë në zonën e Zvërnecit, si rezultat i kolateralit të marrë nga kredi të këqija të klientëve të saj. Në artikull sugjerohej gjithashtu një lidhje mes bankës dhe zhvillimeve publike për këtë zonë.
ABI Bank ka reaguar zyrtarisht duke i cilësuar këto pretendime si të pavërteta dhe të pasakta. Sipas bankës, nuk qëndron asnjë nga akuzat e publikuara lidhur me pronësinë e tokave në Zvërnec.
Në reagimin e saj, ABI Bank flet edhe për pretendime të përsëritura për gjobëvënie ndaj institucionit, duke i konsideruar ato të pabazuara dhe pjesë të një praktike që dëmton informimin publik dhe reputacionin e institucioneve financiare.
Banka thekson se vepron në përputhje të plotë me legjislacionin shqiptar dhe është nën mbikëqyrjen e Bankës së Shqipërisë, si dhe operon sipas standardeve ndërkombëtare të transparencës dhe raportimit financiar. Ajo nënvizon gjithashtu bashkëpunimet me institucione financiare ndërkombëtare dhe angazhimet në projekte sociale në vend.
“ABI Bank sqaron se informacionet e publikuara nuk janë të sakta dhe nuk përputhen me realitetin. Banka operon në përputhje të plotë me ligjet në fuqi dhe është nën mbikëqyrjen e Bankës së Shqipërisë. Çdo veprim i institucionit është i dokumentuar dhe transparent sipas standardeve financiare.”, shkruhet në reagim.
ABI Bank apelon për verifikim të kujdesshëm të informacionit përpara publikimit të lajmeve që lidhen me institucione financiare dhe çështje pronësie.
Ngjarja vjen në një moment të ndjeshëm publik për debatet mbi zhvillimet në zonën e Zvërnecit, ku çështjet e pronësisë dhe investimeve kanë qenë në qendër të diskutimeve dhe reagimeve publike.
