Sa njerëz të besuar të duhen në jetë për të qenë i lumtur?
E Shtunë 2 Mars 2024, 15:16
TiranaPost
Cili është sekreti i lumturisë? Vlera e marrëdhënieve personale po bëhet gjithnjë e më e rëndësishme sot. Për mirëqenien emocionale (dhe jo vetëm) lidhjet me të tjerët janë thelbësore. Psikiatri amerikan Robert Waldinger, i cili ka drejtuar Studimin historik të Lumturisë Njerëzore në Harvard që nga viti 1938, zbuloi rëndësinë e të pasurit të paktën dy njerëzve të besuar për t'iu drejtuar në kohë nevoje. Pra, dy njerëz. Por ka edhe disa kushte të tjera që janë thelbësore.
Rreziqet e vetmisë
Ndarja e shqetësimeve dhe stresit me të tjerët ndihmon trupin të kthehet në një gjendje ekuilibri. Sepse vetmia kronike mund të çojë në nivele të larta stresi dhe të ndikojë negativisht në shëndetin tonë.
Cilësia e marrëdhënieve
Studimi zbuloi se cilësia e marrëdhënieve është thelbësore. Të kesh lidhje të forta dhe domethënëse me të tjerët përmirëson lumturinë dhe shëndetin. “Gjatë studimit, ne u kërkuam pjesëmarrësve të bënin një listë të njerëzve që do të telefononin në mes të natës nëse ishin të sëmurë ose të frikësuar. Pothuajse të gjithë kishin listën e tyre, por kishte nga ata që nuk mund të tregonin askënd. Ndër këta edhe ata që ishin të martuar”, përgjigjet Waldinger i habitur. Dhe kjo është arsyeja pse ai inkurajon të gjithë, pavarësisht nga personaliteti, të kultivojnë miqësi të thella dhe të angazhohen në aktivitete pasionante: në mënyrë që të zgjerojnë rrethin e tyre shoqëror.
Veprimet që duhen bërë
Kalimi i kohës me miqtë e ngushtë, fëmijët dhe partnerin tuaj është thelbësor dhe duhet të jetë pjesë e rutinës suaj, sipas psikiatrit. Takimet e rregullta ndihmojnë në ruajtjen dhe forcimin e lidhjeve emocionale me kalimin e kohës.
Komponenti gjenetik
Por ka edhe një komponent gjenetik për lumturinë. 'Sipas një studimi të psikologes Sonja Lyubomirsky, 50% varet nga ADN-ja jonë, nga temperamenti ynë i lindur.
Pendimet
Për çfarë pendohen më shumë njerëzit? 'Për të punuar shumë dhe për të mos kaluar kohë me njerëzit e dashur', shpjegon Waldinger në intervistë. Studiuesi saktëson se këto janë përgjigjet e atyre që po i afrohen fundit të jetës dhe që janë rreth 80 vjeç. “Është e vërtetë – pranon studiuesi – duket si një klishe, por në të vërtetë është kështu”.
Për çfarë pendohen gratë
Për çfarë pendohen gratë? Pendohen pse e kanë lejuar veten të ndikohen aq shumë nga opinionet e të tjerëve.
Çfarë ju bën krenar?
Kur i pyetën 'çfarë ju bën më të lumtur?' Askush nuk tha 'Unë jam i pasur' ose 'kam fituar një Nobel'. Në vend të kësaj, të gjithë u përqendruan te marrëdhëniet. “Isha një baba i mirë, një nënë e mirë, një udhërrëfyes i mirë”, shpjegon studiuesi, duke renditur përgjigjet. Kur arrijmë në fund të jetës sonë, ne në thelb i kushtojmë vëmendje asaj që ka vërtet rëndësi.
