U nda nga jeta dy ditë më parë, Louis Vuitton gjeti mënyrën që në sfilatë të ishte edhe Virgil Abloh
E Mërkurë 1 Dhjetor 2021, 09:11
TiranaPost
Menjëherë pas ndarjes nga jeta të Virgil Abloh, Louis Vuitton vendosi që sfilatën e radhës t`ia dedikonte atij, krijuesit të kushedi se sa koleksioneve.
Kështu që në sfilatën e Miamit ishte edhe Virgil Abloh, në disa mënyra. Ishte përmes statujës që u ngrit në këmbë në kohë rekord. Ishte përmes dronëve që formuan inicialet e tij në qiell apo mesazhit prekës të shkruar në qiell, “Virgil ishte këtu”.
Virgil humbi luftën dyvjeçare me angiosarkoman kardiake, një formë e rrallë, agresive e kancerit.
“Me dhimbje të thellë mësova për ndarjen nga jeta të Virgil Abloh. Virgjili ishte jo vetëm një mik, bashkëpunëtor i madh, gjeni krijues, vizionar, por edhe një nga komunikuesit më të mirë kulturorë të kohëve tona. Ai hapi rrugën për brezat e ardhshëm. Si një mbështetës i përkushtuar i komunitetit të tij përmes bamirësisë dhe pasioneve të tij, ai ishte një optimist i përjetshëm që besonte se gjithçka ishte e mundur. Në të njëjtën frymë, ne në Louis Vuitton do të vazhdojmë me krenari të festojmë trashëgiminë e tij me një shfaqje të fundit në Miami, sipas dëshirës së tij. Jam i nderuar që e kam quajtur mikun tim. Jam me gruan, fëmijët, prindërit, familjen dhe gjithë komunitetin që u prek nga madhështia e tij”, tha Michael Burke, kryetar dhe CEO i Louis Vuitton.
