BE dhe SHBA kërkojnë zbatimin e marrëveshjes së Ohrit mes Kosovës dhe Serbisë
E Mërkurë 22 Mars 2023, 14:23
TiranaPost
Përfaqësuesi i lartë i Bashkimit Evropian për Politikë të Jashtme dhe Siguri, Josep Borrell, njoftoi ministrat e jashtëm të BE-së, për marrëveshjen e Ohrit që u arrit ndërmjet Kosovës dhe Serbisë me 18 mars. Sipas Borrell, kjo është një arritje e madhe pavarwsisht se nuk u firmos.
“Këto marrëveshje hyjnë në fuqi me deklaratën që e lëshova. Nuk kishte nënshkrim për shkaqe ligjore, por të dyja palët u pajtuan se deklarata ime është përkushtim nga ana e tyre për të plotësuar tërësisht obligimet që dalin nga kjo marrëveshje e aneksi i implementimit”, tha Borrell.
Shefi i diplomacisë europiane përsëriti që Prishtina zyrtare e ka urgjente fillimin e formimit të Asociacionit të komunave me shumicë serbe.
“Kalendari kërkon që secila palë ta bëjë pjesën e vet, nuk fillon ndërtimi i shtëpisë nga kulmi. Disa nga këto gjëra janë shumë urgjente, e kam thënë se Kosova urgjentisht duhet të përkushtohet për formimin e Asociacionit. Janë bërë një sërë zotimesh dhe ne do të shohim se si palët do t'i përmbushin ato”, tha Borrell.
Marrëveshjet e Ohrit
Në takimin e Ohrit, që u mbajt më 18 mars, nën ndërmjetësimin e kryediplomatit europian, kryeministri Albin Kurti dhe Presidenti Aleksandar Vuçiç, ranë dakord me aneksin e zbatimit të Marrëveshjes drejt normalizimit të raporteve. Marrëveshja, që u publikua nga Bashkimi Europian me 27 shkurt në Bruksel, ka 11 nene, por nuk përmend në mënyrë specifike njohjen e ndërsjelltë.
Megjithatë, dokumenti kërkon nga të dyja palët që t'i pranojnë dokumentet dhe simbolet e njëra-tjetrës, përfshirë edhe pasaportat, diplomat dhe targat. Ajo kërkon, po ashtu, nga palët që t'i zbatojnë të gjitha marrëveshjet e arritura deri më tani në dialogun për normalizimin e marrëdhënieve, përfshirë edhe atë për formimin e Asociacionit të komunave me shumicë serbe në Kosovë.
Kryeministri i Kosovës Albin Kurti, i cili nuk pëlqen ta quajw Asociacion, thotë se, “Kosova do të udhëhiqet prej standardeve më të larta që edhe serbët në Kosovë të mos kenë asnjë cenim”.
“Ekziston një paragraf i cili flet për një nivel adekuat të vetëmenaxhimit të komunitetit (jo-shumicë) serb dhe natyrisht ne do të udhëhiqemi prej standardeve më të larta që edhe serbët në Kosovë të mos kenë asnjë cenim, asnjë diskriminim”, tha kryeministri Kurti pas një takimi që zhvilloi me ambasadorët e vendeve të QUINT-it në Prishtinë.
Shtimi i presionit
Presion mbi Prishtinën dhe Beogradin që të nisin menjëherë zbatimin e marrëveshjes po bëjnë edhe SHBA-të. I dërguari amerikan për Ballkanin Perëndimor, Gabriel Escobar, që ishte vëzhgues në takimin e Ohrit, tha se pajtimi ndërmjet Kosovës dhe Serbisë për zbatimin e marrëveshjes për normalizimin e marrëdhënieve është historik dhe palët duhet të fillojnë menjëherë vënien në jetë të saj.
Sipas tij, marrëveshja ka detyrime ligjore për tw përmbushur. “Prishtina duhet ta bëjë punën e saj, e këtë duhet ta bëjë edhe Serbia,” tha ai duke shtuar se, “Beogradi duhet të fillojë me njohjen e dokumenteve të Kosovës dhe simboleve kombëtare”.
“Për Kosovën është e rëndësishme që të fillojë hartimin e versionit të saj të Asociacionit të komunave me shumicë serbe. Ka shumë detyrime të tjera, por mendoj se këto janë më të rëndësishmet”, tha Escobar, në një konferencë me gazetarë.
“Ne besojmë se duhet të jetë një Asociacion që iu shërben interesave të popullit të rajonit, që funksionon për të dyja palët, që lejon serbët etnikë të marrin pjesë plotësisht në jetën civile dhe demokratike të Kosovës. Por duhet të jetë edhe një Asociacion që nuk shkel strukturën kushtetuese të Kosovës, apo prek funksionalitetin e saj”, tha Gabriel Escobar.
Zbatimi është obligim ligjor
Esobar bëri të qartë se pajtimi i Kosovës dhe Serbisë në Ohër për zbatimin e marrëveshjes është obligim ligjor, ndonëse nuk kishte nënshkrime.
“Dua ta bëj të qartë. Ky është detyrim ligjor për të cilin Serbia është pajtuar, sikurse edhe Kosova. Diskutimi rreth nënshkrimit është përqendrim ndaj diçkaje që nuk ka ndikim në faktin se e kemi një marrëveshje. Është një marrëveshje. Ne e trajtojmë të tillë. Të dyja palët hynë në të me seriozitet dhe Bashkimi Europian konfirmoi se është e tillë në sytë e tij”, theksoi emisari amerikan Gabriel Escobar.
Vijat e kuqe të Serbisë
Nga ana tjetër, ministri i Jashtëm i Serbisë, Ivica Daçiç, ka thënë se Serbia është e gatshme ta zbatojë marrëveshjen e arritur me Kosovën në Ohër, pa prekur vijat e saj të kuqe.
“Vijat tona të kuqe, me të cilat nuk pajtohemi përfshijnë njohjen reciproke: jo njohje e Kosovës dhe as anëtarësim i Kosovës në Kombet e Bashkuara”, tha Daçiç në Bruksel, gjatë një konference donatorësh, pas tërmetit që ka goditur Turqinë.
Sipas tij, marrëveshja e Ohrit, “është në drejtim të normalizimit të marrëdhënieve dhe asgjë më shumë se kaq”.
“Mendoj se është vazhdimësi e asaj që kemi filluar rreth 10 vjet më parë dhe në këtë aspekt është shumë e rëndësishme të dihet se kjo është një marrëveshje për hapat e mëtejshëm në normalizimin e marrëdhënieve dhe jo për çështjet e statusit”, u shpreh Daçiç.
Sidoqoftë, plani europian për normalizimin e marrëdhënieve, për të cilin Prishtina dhe Beogradi u pajtuan më 27 shkurt në Bruksel dhe me 18 mars në Ohër për zbatimin e tij, kërkon marrëdhënie të mira fqinjësore, njohje të dokumenteve dhe simboleve dhe respektim të sovranitetit dhe tërësisë tokësore.
Ai kërkon që palët të mos pengojnë njëra-tjetrën në proceset integruese, por nuk kërkon njohje të ndërsjellë. Pikërisht për këtë partitë opozitare në Kosovë ftuan për të enjten në seancë parlamentare kryeministrin Kurti të raportojë për marrëveshjen për të cilën opozita thotë se do të dëmtojë për një periudhë të gjatë proceset integruese të vendit./DW
