Qyteti

Simbolika e 251 pemëve prej bliri që u mbollën sot në Astir

Simbolika e 251 pemëve prej bliri që u mbollën sot në Astir

251 pemë bliri i janë shtuar Astirit sot.

Pemët u mbollën në rrugën “Tom Plezha”, aksi më i ri paralel me Unazën e Madhe dhe ishin dhuratë nga Agjencia Turke për Koordinim dhe Bashkëpunim, TIKA.

Pse 251?

Sepse u mbollën në përkujtim të 251 dëshmorëve, të cilët sakrifikuan jetën e tyre gjatë tentativës për grusht shteti më 15 korrik të 2016.-ës

Të pranishëm ishin kryetari i Bashkisë së Tiranës, Erion Veliaj dhe ambasadori i Republikës së Turqisë në Shqipëri, Murat Ahmet Yörük.

Simbolika e 251 pemëve prej bliri që u mbollën sot në Astir

“Janë 251 pemë bliri të rritura që i dhurohen këtij komuniteti, një lagje fantastike e Tiranës dhe një zonë që është transformuar totalisht. Është transformuar i gjithë aksi “Tom Plezha”. Ne humbëm shumë kohë me Unazën, jam shumë i keqardhur për këtë, tre vite të harxhuara dëm duke politizuar investimet e qeverisë edhe të Bashkisë. Por sot jemi në një situatë, kur ky aks mes përmes Astirit, i cili më përpara ishte një zigzage e tmerrshme e trashëguar nga koha e ish-komunës, ku autobusët ngecnin përditë, ku banorët nuk kishin frymëmarrje, sot ka një aks me dy kalime, me parkim anash dhe tani, falë edhe këtij kontributi bujar, ka dhe 251 pemë,” tha Veliaj gjatë fjalës së tij.

“Dy janë mundësitë në një qytet: ose vetëm ankohesh, ose mobilizohemi dhe themi ‘ja ku është kontributi im’! Sot dikush jep 251 pemë, nesër dikush ndihmon me një lulishte, pasnesër dikush me një kënd lodrash, apo me pastrimin e plehrave, - është e vetmja mënyrë sesi vetëm duke dhënë nga një kontribut secili, Tirana bëhet më e mirë. Duke u ankuar nuk ecet përpara. Duke kontribuar secili ecim përpara. Edhe për miqtë ne kemi vetëm mirënjohje. E vlerësoj shumë. Jam i sigurt që gjithë komuniteti këtu në një rrugë që ka dalë në dritë, ku janë shitur dhe janë marrë me qira të gjitha banesat e kateve të para të braktisura më parë prej infrastrukturës së keqe, sot, edhe falë kësaj dhurate bujare, ka më shumë hijeshi. Është rritur vlera e pronës dhe e apartamenteve në këtë komunitet,” u shpreh kryebashkiaku Veliaj.

Kurse ambasadori turk tha:

“Përfitoj nga rasti të falënderoj kryetarin e Bashkisë, z. Erion Veliaj për punën e vyer që bën për përmirësimin e infrastrukturës së këtij qyteti, në mënyrë që jetesën e këtyre qytetarëve ta bëjmë më të mirë. Unë si një qytetar i Tiranës, si një banor i këtij qyteti jam shumë i lumtur që shikoj një kryetar Bashkie që punon për ndryshimin dhe zbukurimin e jetës së këtij qyteti,” u shpreh ambasadori i Republikës së Turqisë në Shqipëri, Murat Ahmet Yörük.