Maja e PIRAMIDËS së inovacionit e kulturës në Tiranë
E Martë 12 Nëntor 2024, 20:17
TiranaPost
Teksa i afrohesh Piramidës së Tiranës përjeton sakaq ndjesitë e diçkaje të re, moderne, pse jo edhe futuriste. Këtë hije ia shton më tej fakti që ky objekt arkitekturor, ku e shkuara është ndërthurur aq bukur me të ardhmen, është kthyer tanimë në një nga ndalesat rutinë për turistët e huaj. Atyre iu pëlqen të ngjisin shkallët për të shijuar pamjen spektakolare nga maja e Piramidës dhe sa bukur është të dëgjosh të fliten kaq shumë gjuhë të huaja në metropolin tonë tanimë evropian.
Por teksa në fasadat e Piramidës fliten gjuhë të ndryshme të botës, brenda mureve të saj historike fliten gjuhët universale të digjitalizimit, teknologjisë, inovacionit, por edhe të artit e kulturës. Ky vend është shndërruar në majën e Piramidës së jetës bashkëkohore në kryeqytet, që pret e përcjell çdo ditë krijues e inovatorë të moshave të ndryshme, artistë, organizata lokale e ndërkombëtare, mirëpret festivale modeste dhe evente madhore, siç ishte për shembull Samiti i Ballkanit Perëndimor, i organizuar për herë të parë në vendin tonë. Një test i madh për Piramidën që rezultoi një sukses dhe mori vlerësimin edhe të liderëve evropian. Por këtu evente ka çdo ditë. Dhe shpesh disa herë në ditë. Të vogla e të mëdha. Mbi inovacionin dhe artin. Lokale e ndërkombëtare. Të zhumrshme e të qeta.
Ka ardhur momenti të mos themi më “Piramida po transformohet në një tech hub apo qender inovacioni”, por se Piramida ka marrë tashmë formën e saj përfundimtare, për të cilën u projektua dhe pa frikë mund të quhet “maja e piramidës” e jetës vibrante të pjesës më intelektuale të shoqërisë, si sipërmarrës, programues, artistë, të rinj të talentuar, etj. Nëse ke fatin, si ne sot, që të bësh edhe një tur në hapësirën dedikuar TUMO-s, do të kuptosh gjëra që të shpëtojnë në pamje të parë. Teksa vizitojmë dhe njihemi nga afër me të rinj të disiplinave të ndryshe, si ilustrimi, animacioni, muzika, programimi, etj. mbetemi pa fjalë jo vetëm nga talentet, por edhe kushtet që lejojnë rininë e Gen Z, ose më mirë të themi Gen TUMO, të arrijë potencialin e vetë maksimal. “Të gjithë mbeten të befasuar kur e shohin TUMO-n nga afër dhe mësojnë më tepër rreth nesh”, shprehet Shqipe Berisha, Drejtore Ekzekutive e TUMO-s, qendra që tashmë i ofron krejtësisht falas kurset për të rinjtë shqiptarë.
Gjithçka e gjen në këtë hapësirë, që nga start up-et, inkubatorët, mjediset e përbashkëta të punës, ose co-working spaces, duke iu lejuar kështu mendjeve të ndritura të Tiranës të jenë afër njëri-tjetrit e të ndajnë ide. Infrastruktura moderne, pajisja me internet super të shpejtë, auditoriumi, sallat e konferencave dhe shumë mjedise të tjera ofrojnë mundësinë që “banorët” e Piramidës, por edhe të tjerë nga jashtë, të organizojnë evente të ndryshme, workshop-e, hackathon-e, ekspozita, promovime librash, etj. Një vend ku gjen gjithçka dhe këdo, ku ata me përvojë ndajnë dijen dhe të rinjtë sjellin ide të freskëta. E sigurisht, ku ka edhe kafene të bukura, si vendtakime po aq tërheqëse si çdo detaj tjetër, brenda dhe përreth Piramidës.
Por çfarë e bëri kaq të suksesshëm këtë ndërtesë që për vite me radhë e kishte humbur sharmin dhe shkëlqimin e saj? Disa arsye. Që nga vizioni dhe planifikimi i mirëmenduar, deri tek arsyet më praktike, si pozicionimi në qendër të Tiranës, atmosfera krijuese, shkëmbimi i njohurive mes “komshinjve”, hapësirat e bollshme, po aq sa qoshet e tërhequra për krijuesit me ide të çmendura, që duan të punojnë në qetësi.
Dhe e bukura është se këtë vend nuk mund ta shijojnë vetëm “banorët”, por edhe miqtë e panumërt nga jashtë, një ndër të cilët mund të jesh edhe ti. Mund të zgjedhësh të jesh çfarë të duash për Piramidën e Tiranës: Një sipërmarrës inovator që punon në mjediset e saj, një ithtar i teknologjisë që mund të bëhesh pjesë e nismës më të re që vjen së shpejti, Innovation Hub, një artist që prezanton një koleksion veprash apo një biznes që organizon një festival për të rinjtë. Por mund të jesh edhe prindi i një adoleshenti apo të riu që ndjek një nga kurset e TUMO-s, duke siguruar kështu edhe profesionin e së ardhmes, siç e kërkon epoka digjitale sot apo edhe të jesh një vizitor i thjesht e të kërkosh një guidë për të njohur më mirë Piramidën tashmë të rivitalizuar të Tiranës.
