Të shtëna me armë zjarri në zyrën e PD në Kavajë! Raportohet një i plagosur
Të shtëna me armë zjarri janë regjistruar pasditen e sotme në zyrën elektorale të Partisë Demokratike në Kavajë.
Sipas raportimeve paraprake prej incidentit ka mbetur i plagosur një 27-vjeçar, Bledar Okshtuni i cili është qëlluar në këmbë. Ai ndodhet në Spital jashtë rrezikut për jetën. Autori ndodhet në kërkim nga Policia.
Policia ka shkuar në vendngjarje për të zbardhur rrethanat e incidentit, ndërkohë që edhe kryetari i PD, Lulzim Basha është nisur drejt Kavajës.
Në vendngjarje ndodhet edhe kandidatja për deputete e kësaj zone, Grida Duma.
Ende nuk është e qartë nëse konflikti ka pasur natyrë përplasje politike apo shkaqe të tjera.
Njoftimi i Policisë për ngjarjen:
Plagosi me armë zjarri 27 vjeçarin, identifikohet dhe shpallet në kërkim autori i dyshuar.
Vijon krehja e zonës për kapjen e tij.
Sot rreth orës 19:00, në lagjen nr.4, në Kavajë, shtetasi N. J., dyshohet se si pasojë e një konflikti për motive të dobëta, ka hyrë në ambientet e brendshme të një zyre elektorale të një subjekti politik dhe ka plagosur me armë zjarri pistoletë në këmbë shtetasin B. O., 27 vjeç, i cili ndodhet në spitalin e Durrësit, nën kujdesin e mjekëve.
Menjëherë forca të shumta Policie kanë shkuar në vendngjarje dhe vijon krehja e zonës si edhe janë ngritur pika kontrolli në hyrje -dalje të Qytetit për kapjen e autorit.
Grupi hetimor nën drejtimin e Prokurorisë vijon punën për zbardhjen e plotë të rrethanave të ngjarjes.
Tiranapost.al