SPAK dërgon për gjykim ish-ministrin Fatmir Mediu për çështjen Gërdeci
E Mërkurë 8 Shkurt 2023, 10:20
TiranaPost
Prokuroria e Posaçme ka dërguar për gjykim ish-ministrin e Mbrojtjes Fatmir Mediu për çështjen “Gërdeci”.
Mediu akuzohet për veprën penale “Shpërdorimi i detyrës”, e kryer në bashkëpunim, parashikuar nga nenet 248 dhe 25 të Kodit Penal, si dhe për kryerjen e veprës penale “Shpërdorim i detyrës” në bashkëpunim me subjekt ushtarak-kuadër komandues, parashikuar në nenet 70/2 e 2 të Kodit Penal Ushtarak dhe neni 25 i Kodit Penal.
Fatmir Mediu akuzohet se në lidhje me procesin e çmilitarizimit dhe çmontimit të municioneve që është zhvilluar në ambientet e ish “Brigadës së Tankeve”, në fshatin Gërdec, Bashkia Vorë, në bashkëpunim me funksionarë të tjerë të Ministrisë së Mbrojtjes si dhe persona që kanë pasur cilësinë e ushtarakut kuadër komandues, ka nxjerrë disa akte nënligjore në kundërshtim me ligjin dhe V.K.M Nr.138, date 14. 03. 2007 “Për procedurën e trajtimit të armëve, teknikes dhe pajisjeve te forcave te armatosura, te hequra nga armatimi dhe përdorimi, për sa i përket shitjes për çmontim dhe çmilitarizim të një sasie municioni”, të cilat kanë dëmtuar interesat e ligjshme të shtetit dhe kanë sjellë avantazhe të padrejta për shoqëritë SAC inc dhe Albademil sh.p.k.
