Fotot më të bukura nga java e modës në Milano
“Street style”, ose stili i fotografuar në rrugë, është kthyer zyrtarisht në Javën e Modës në Milano Pranverë/Verë 2022. Në fakt vetë java e modës milaneze ka hapur dyert për blogeret, influencuesit, blerësit, editorët e modës etj. më në fund pas një viti shkëputje. Sigurisht, duke respektuar të gjitha masat mbrojtëse ndaj Covid. Lejohen të marrin pjesë vetëm ata që janë vaksinuar, dhe këtë e di nga përvoja ime me sfilatat e New Yorku-t. Të ftuarve iu është kërkuar gjithashtu të ruajnë distacën prej 2m (6 feet) nga njëri-tjetri. Për të gjithë kuriozët dhe modëdashësit, më poshtë kemi bërë një përmbledhje të fotove më të bukura të javës së modës.
E Diel 26 Shtator 2021, 20:50
Stela Sallaku
Buton-ups (këmisha e xhaketa të kopsitura), duket se ishin elementi më i parë në javën e modës. Një bluzë oversize ishte e kombinuar me pantallona të shkurtra biçikletash dhe Converse, ndërsa një këmishë e bardhë e freskët ishte veshur me një kravatë, një jelek lëkure të zi dhe buzët të lyer me ngjyrë kafe si në vitet '90.
Meqë jemi tek lëkura, shumica e veshjeve kishin një element lëkure në to. Kjo për dy arsye, e para sepse një nga trendet sivjet do jetë pikërisht frymëzuar nga “biker girls”, dhe arsyeja e dytë është se lëkura është materiali më i përdorur në motin me shi të Milanos.
Disa nga kombinimet ishin-një xhaketë sportive e madhe, një xhaketë biker dhe një pallto me qepje të dukshme që bëjnë kontrast me copën.
Pastaj ka një shumëllojshmëri të veshjeve të leshta të punuara me shtiza. Një triko e leshtë tani kombinohet me fund të hollë chiffon dhe sandale me platformë si Amina Muadd. Trikot janë ndër veshjet më të rehatshme dhe nëse i kombinon siç duhet duken dhe elegante. Pamë triko leshi të trasha, sytjena të punuara me shtiza si dhe fundi laps i Fendit.
