Lajme nga Bota

Papa Françesku ndalon në një dyqan muzike në Romë, por kapet nga gazetari

Papa Françesku ndalon në një dyqan muzike në Romë,

Papa Françesku është ankuar prej kohësh që nuk mund të ecë nëpër qytet pa u vënë re, siç bënte para se të bëhej Papë. Megjithatë, pasi u kap nga kamera duke bërë një vizitë të paparalajmëruar në një dyqan diskografik në Romë këtë javë, në një letër drejtuar gazetarit fotografues duket se e ka ruajtur sensin e humorit.

Françesku i shkruajti gazetarit të Vatikanit, i cili mbrëmjen e së martës u gjend në vendin dhe në kohën e duhur, kur Papa doli nga Vatikani për të bekuar dyqanin e sapo rinovuar Stereo Sound pranë Panteonit.

Javier Martinez-Brocal, drejtor i agjencisë së lajmeve “Rome Reports”, filmoi Papën duke dalë nga dyqani, pamjet u bënë virale dhe madje u publikuan në gazetën e Vatikanit, “L'Osservatore Romano”.

Martinez-Brocal më pas iu drejtua Papës me një letër ku i shpjegonte se nuk ishte një paparac, dhe i vinte keq që Françesku nuk mund të lëvizte më pa u vënë re, por kjo histori ishte një dozë shumë e nevojshme, një lajm i bukur në një botë të përfshirë nga tragjeditë.

"Nuk do ta mohoj se ishte (fat i keq) që pasi morën të gjitha masat paraprake, ishte një gazetar që priste dikë në linjën e taksisë," u shkruan Françesku në përgjigjen për gazetarin. Por ai shtoi: "Nuk mund të humbisni sensin tuaj të humorit".

Françesku më pas përsëriti se ajo që i mungon më shumë tani që është Papë është pamundësia për të bërë shëtitje, siç bënte dikur në Buenos Aires. Ish-kardinali Jorge Mario Bergoglio ishte i njohur për përdorimin e transportit publik nëpër kryeqytetin argjentinas, duke iu shmangur makinave private që përdorin kardinalët e tjerë për të vizituar famullitë. Ai u bë papë në vitin 2013.

Françesku pranoi se Martinez-Brocal thjesht po bënte punën e tij si gazetar kur regjistroi ngjarjen. "Faleminderit që bëtë detyrën tuaj, edhe nëse kjo e vuri në vështirësi Papën," shkruajti ai me humor.

Pronarët e dyqanit Stereo Sound thane për ‘Associated Press’ se Françesku kishte shkuar rreth orës 19:00, pa lajmëruar. Ai u kishte thënë atyre gjatë një takimi të mëparshëm në Vatikan se do të shkonte për ta vizituar ambjentin.

“Ai hyri në dyqan dhe ishte një takim i mrekullueshëm. Dhe siç premtoi, ai e bekoi dyqanin”, tha pronarja e dyqanit Tiziana Esposito.

Bashkëpronari Danilo Genio tha se Françesku ishte klient prej kohësh, kishte shkuar sa herë që ishte në Romë për takime në Vatikan kur ishte në detyrën e priftit, kryepeshkopit dhe më pas kardinalit të Buenos Aires.

"Sa herë vinte në Romë për të shkuar në Vatikan, së pari ndalonte këtu për të blerë disa dhurata," tha ai.

Françesku, i cili u rrit duke dëgjuar opera në radio dhe i pëlqen tango, Mozart dhe Wagner, nuk bleu asgjë këtë herë. Por pronarët e dyqanit i dhanë një CD me muzikë klasike.