Një kompani ajrore në Zelandën e Re po peshon njerëzit para se të hipin në avion
E Mërkurë 31 Maj 2023, 08:13
TiranaPost
Hiqni këpucët. Nxirrni çelësat nga xhepi. Hipni në peshore.
Autoriteti i Aviacionit Civil të Zelandës së Re ka kërkuar që linja ajrore e saj kombëtare të peshojë pasagjerët që nisen në fluturimet ndërkombëtare nga Aeroporti Ndërkombëtar i Auckland deri më 2 korrik 2023.
Programi, të cilin Air New Zealand e quan një studim i peshës së pasagjerëve, është një mënyrë për të mbledhur të dhëna mbi ngarkesën dhe shpërndarjen e peshës nëpër avionët.
“Ne peshojmë gjithçka që ngarkohet në aeroplan – nga ngarkesa e ushqimeve në bord, te bagazhet”, tha në një deklaratë Alastair James, specialisti i përmirësimit të kontrollit të ngarkesës në linjën ajrore.
Megjithatë, pesha është një gjë personale që jo të gjithë dëshirojnë ta zbulojnë. Për të mbrojtur privatësinë e individëve, linja ajrore thotë se i ruan të dhënat si anonime.
Udhëtarëve u kërkohet të qëndrojnë në një peshore dixhitale kur të bëjnë check-in për fluturimin e tyre. Informacioni për peshën e tyre më pas dorëzohet në sondazh, por nuk shihet në ekranin e agjentit.
“Ne e dimë se të hipësh në peshore mund të jetë e frikshme. Ne duam të sigurojmë klientët tanë se nuk ka asnjë ekran të dukshëm askund. Askush nuk mund ta shohë peshën tuaj, madje as ne”, tha James.
Kjo nuk është hera e parë që Air NZ u ka kërkuar pasagjerëve të hipin në peshore përpara se të hipin në fluturimet e tyre. Pasagjerët vendas morën pjesë në një sondazh në vitin 2021, por ai për udhëtarët ndërkombëtarë u vonua për shkak të pandemisë.
Midis njerëzve të cilëve mund t'u kërkohet të marrin pjesë në sondazh janë ata që udhëtojnë me fluturimin direkt nga Auckland në aeroportin JFK të Nju Jorkut.
Itinerari kryesor 17-orësh u lançua vjeshtën e kaluar si një bazë e strategjisë së Air NZ pas pandemisë. Është gjithashtu një nga fluturimet më të gjata në botë.
