Largimi i Messit nga Barcelona, Laporta zbulon çfarë ndodhi mes tyre: Kur emocionet para parave nuk llogariten
E Premte 6 Gusht 2021, 11:57
TiranaPost
Largimi i futbollistit Lionel Messi nga Barcelona ishte lajmi i mbrëmjes së djeshme dhe aludimet ishin të shumta. Çfarë ndodhi me Messin, një prej lojtarëve më të mirë në botë dhe ekipin? Pse pati mosmarrëveshje dhe pse nuk u zgjidh?
Presidenti i Barcelonës, Joan Laporta ka treguar në konferencën për shtyp arsyet e largimit të futbollistit dhe thotë se nuk ndihet fajtor për këtë situatë. Çështja sillet tek paratë!
Ja çfarë tha Joan Laporta:
"Unë nuk ndihem aspak fajtor. Ne bëmë gjithçka që mundëm për tu siguruar që Messi të qëndrojë te Barça, brenda situatës ekonomike të klubit. Ne kishim rënë dakord për kontratën. Sa i përket pyetjes se kush duhet fajësuar... Unë nuk e di. Nuk dua të vazhdoj të përsëris qëndrimin e tmerrshëm që kemi trashëguar. Ne nuk kishim gjashtë muaj kohë për ta zgjidhur këtë. Kishte një buxhet që ishte shumë më i keq nga sa e imagjinonim më parë. Unë kisha thënë se bisedimet po shkonin mirë sepse dukej se LaLiga mund të zgjaste rregullat e 'fair -play' dhe ne kishim një marrëveshje me lojtarin. Ne ishim duke pritur. Por vjen koha kur duhet të merret një vendim dhe një qëndrim. Ne nuk mund të vazhdojmë kështu, na duhej të merrnim një vendim".
Sqarimi i tij vijoi:
"Konkretisht mosmarrëveshja ishte paga, në lidhje me kufirin e pagës me rregullin 4 me 1. Për të qenë në gjendje të kemi 25 milionë euro rroga, ne do të duhet ta zvogëlonim atë me 100. Kjo do të kërkonte shitjen e shumë lojtarëve. Ne kishim shpresuar se epoka pas Messit do të fillonte pas dy vitesh. Ne menduam se kontrata do ishte brenda kritereve të LaLiga, funksionon mirë në vendet e tjera, por këtu, nuk u pranua. Unë nuk dua të krijoj shpresa të rreme. Ai lojtar ka oferta të tjera dhe ka një kufi në kohë pasi LaLiga pritet të fillojë së shpejti - dhe atij i duhet kohë për të shqyrtuar të gjitha opsionet e tij. Siç them unë, ne kemi shpenzuar mbi dy muaj duke punuar në këtë. Ne ramë dakord për një marrëveshje dyvjeçare e cila do të paguhej në pesë vjet. Messi ndihmoi për të bërë gjithçka sa më të lehtë të jetë e mundur. Por ka një numër kontratash që mund të zgjidhen në mënyrë të njëanshme, por që gjithashtu përbëjnë një rrezik. Regjistrimi i Leos do të kërkonte pranimin e një marrëveshjeje që nuk do sillte përfitime nga Barça. Leo donte të qëndronte në ekip dhe kjo ishte ajo që edhe ne donim. Gatishmëria e lojtarit ishte kryesore. Unë do të doja të falënderoja të gjithë ata që morën pjesë në negociata, dhe të cilët duhej të gjenin zgjidhje për aspekte të ndryshme që prekën të dyja palët. Lojtari më i mirë në botë ka propozime të tjera dhe ka ardhur momenti kur ju duhet të lini emocionet mënjanë dhe të shikoni me ftohtësi shifrat. Ne duhet të respektojmë rregullat e LaLiga, edhe pse kishim shpresuar se do të ishin më fleksibël. Leo meriton gjithçka, ai ka treguar dashurinë e tij për Barçën dhe gatishmërinë e tij për të qëndruar. Unë jam i trishtuar, por jam i bindur se kemi bërë atë që është më e mira për FC Barcelonën. Arsyet pse ne nuk mund të arrinim një marrëveshje ishin mjaft të qarta ishte për shkak të situatës ekonomike në të cilën ndodhet klubi dhe duke bërë një shpenzim të një madhësie të tillë ... Ne ishim të përgatitur për ta bërë këtë, por ne nuk kemi asnjë diferencë me faturën e pagave, ne e kemi tejkaluar atë. Menaxhimi katastrofik i bordit të mëparshëm do të thotë se e kemi tejkaluar kufirin dhe nuk kemi kohë për ta kthyer atë situatë" .
Laporta shpjegoi me pak fjaë se Barcelona nuk ishte e gatshme të hipotekonte klubin për 50 vjet për të përmbushur kërkesat e Fair Play të Financave të LaLiga dhe pagën e kontratës së parë të Mess-it.
"Ne nuk mund të siguronim kontratën e parë të Messit, do ta shpjegoj pse në detaje më vonë. Për të mbetur brenda kufizimeve të 'Fair Play', Barça do të duhet të pajtohet me një kontratë që në thelb nënkupton hipotekimin e klubit për gjysmë shekulli, për televizionin e të drejtat e transmetimit. Unë nuk jam i përgatitur të hipotekoj të drejtat e klubit për askënd. Institucioni ynë është mbi gjithçka tjetër, përfshirë lojtarin më të mirë në botë. Ne do t'i jemi gjithmonë mirënjohës përjetësisht".
Artikulli i As.com përkthyer dhe përshtatur në shqip nga Tiranapost.al.
