Avioni Boeing i nisur nga Londra goditet nga turbulencat, humb jetën një pasagjer dhe plagosen 30 të tjerë
E Martë 21 Maj 2024, 13:14
TiranaPost
Një person ka vdekur dhe disa të tjerë janë plagosur gjatë një fluturim të Singapore Airlines që u godit nga turbulenca të forta.
Boeing 777-300ER ishte nisur nga Londra me destinacion Singaporin, por për shkak të turbulencave u detyrua të bënte ulje të detyruar në Bangkok.
Në bordin e avionit ishin gjithsej 211 pasagjerë dhe 18 anëtarë të ekuipazhit, tha linja ajrore në një deklaratë.
“Singapore Airlines i ofron ngushëllimet më të thella familjes së të ndjerit”, thuhet në njoftim.
Ende është e paqartë se çfarë ka ndodhur saktësisht në bordin e fluturimit dhe si humbi jetën pasagjeri.
