Pse ishte ky koleksion i Valentino-s vetëm Pink?
E Diel 13 Mars 2022, 15:20
Tiranapost
Nga Emi Seiti/ Një zhytje e plotë në një botë rozë. Një univers në të cilin gjithcka- nga skenografia te veshjet etj. ishte vetëm me ngjyrën rozë.
Koleksioni FW22-23 i Valentino-s, i prezantuar gjatë javës së modës në Carreau du Temple në Paris, ishte një festë e vërtetë e rozës.
Ngjyra e energjisë, kuriozitetit, shpikjes, komunitetit dhe dashurisë.
“Një formë lirie që ndoshta nuk ekziston askund tjetër në sferën e ngjyrave” siç thuhet dhe nga vetë Pierpaolo Piccioli i cili për sezonin e ardhshëm ka propozuar një gamë ngjyrash të reduktuara në një nuancë të vetme, për të rritur individualitetin dhe për të rritur personalitetin tek ata që e veshin.
Në rreshtin e parë, gjatë spektaklit, nuk mund të mungonte Zendaya, muza e maison-it, e cila për këtë rast veshi një kostum total- pink dhe me takat me platformë fuchsia me majë katrore që tashmë janë të destinuara të bëhen një ikonë e vërtetë.
Koleksioni i Valentino-s për vjeshtën-dimrin e ardhshëm është një koleksion monokromatik i realizuar nga veshje totale-rozë- me vetëm disa prekje të së zezës- për të eleminuar tronditjen vizuale dhe për të përqëndruar gjithë vëmendjen tek siluetat, teksturat, dhe detajet e rrobave.
