Shqipëria nuk ia ka nevojën Rusisë, jemi 100% me energji të përtëritshme
E Hënë 29 Gusht 2022, 21:13
TiranaPost
Kryeministri Edi Rama i cili ishte sot i pranishëm në edicionin e 17-të Forumit Strategjik të Bled-it në Slloveni, u shpreh se Shqipëria është ndër të rrallat vende që nuk ia ka nevojën Rusisë për gaz.
“Shqipëria është unike se nuk ka gaz, nuk ia kemi nevojën Rusisë. Historia jonë ka qenë e tillë që ne nuk kemi asnjë lloj ndjesie ndaj Rusisë, sepse në perandorinë sovjetike Stalini u rrëzua me hijeshi, ndërkohë ne e mbajtëm edhe pas rënies së Murit të Berlinit. Ne jemi 100% me energji të përtëritshme. Ne jemi të lumtur kur Zoti qan, sepse kemi burime uji,” deklaroi Kryeministri Rama.
Ai tha se vërtet vendi ynë ka një buxhet më të vogël se ai i Kristiano Ronaldos, por ka dhe inflacionin më të ulët në rajon. “Ne po e mbulojmë këtë diferencë që është shumë e dhimbshme për buxhetin shqiptar, që është edhe më i vogël se ai i Kristiano Ronaldos. Nuk kam gjë kundër Ronaldos, mos e merrni si sjellja e një juventini të tradhtuar por dua të them që buxhetet tona janë shumë modeste, shumë të kufizuara krahasuar me të mëdhenjtë. Megjithatë kemi inflacionin më të ulët tani në rajon,” u shpreh Rama.
Forumi zhvillohet çdo vit në fund të verës, si një platformë gjithëpërfshirëse me një pjesëmarrje të larmishme personalitetesh nga fusha e politikës, diplomacisë, ekonomisë, sektorit privat e publik dhe akademikë, të cilët mblidhen së bashku për të diskutuar sfidat kryesore në shekullin e 21-të.
