Aktualitet

Presidenti Meta i kërkon KLSH të bëjë audit në “AlbControl”: Hetoni organizimin dhe si përdoren fondet publike

Presidenti Meta i kërkon KLSH të bëjë audit në

Presidenti Ilir Meta i ka bërë ditën e sotme një kërkesë zyrtare Kontrollit të Lartë të Shtetit për të çelur një audit mbi shoqërinë “AlbControl”, SH.A.-në në të cilin u pezullua puna e kontrollorëve ditën e djeshme dhe që solli paralizimin e qarkullimit ajror mbi Republikën e Shqipërisë.

Meta i bën thirrje KLSH që të hetojë mënyrën e organizimit të shoqërisë dhe si i përdor fondet publike duke marrë shkas nga pretendimet e kontrollorëve se ndonëse rrogat e tyre janë ulur, tenderat kanë vazhduar.

Deklarata e plotë e Presidentit Meta:

Nisur nga situata tepër e rëndë e krijuar dhe veçanërisht rolit, që ka “Albcontrol” për administrimin dhe kontrollin e hapësirës ajrore të Republikës së Shqipërisë, e lidhur direkt me sigurinë kombëtare të vendit dhe me garantimin e shërbimeve për udhëtarët dhe qytetarët shqiptarë, Presidenti i Republikës, SH.T.Z. Ilir Meta, i është drejtuar sot zyrtarisht Kontrollit të Lartë të Shtetit, duke i kërkuar të fillojë pa vonesë një auditim të plotë në shoqërinë “Albcontrol” mbi:

– mënyrën e menaxhimit të kësaj shoqërie;

– respektimin e dispozitave ligjore në vendimmarrjet e organeve drejtuese;

– përdorimin e fondeve publike;

– respektimin e procedurave në marrëdhëniet e punës, si dhe

– çdo aspekt tjetër që paraqet rrezik për veprimtarinë e sigurt dhe funksionimin normal të “Albcontrol”.

Presidenti Meta po ndjek nga afër dhe me vëmendje zhvillimet lidhur me menaxhimin e situatës në “Abcontrol” dhe në aeroportin “Nënë Tereza”, dhe i kërkon autoriteteve respektive të marrin të gjitha masat, për të mos vënë në rrezik sigurinë e hapësirës ajrore në Republikën e Shqipërisë, për të rifilluar pa vonesë funksionimin e monitorimit ajror dhe të shërbimeve aeroportuale, duke respektuar të drejtat dhe detyrimet reciproke, pa tejkaluar në mënyrë shproporcionale me reagimin e tyre, përgjegjësitë ligjore mbi këtë rast.

Presidenti i Republikës u bën thirrje për reflektim të gjithë aktorëve të përfshirë dhe është i gatshëm në çdo moment të thërrasë urgjent një tryezë për një zgjidhje sa më të shpejtë dhe të arsyeshme.

Tiranapost.al