Aktualitet

Policia reagon pas raportimeve për hakërimin e sistemit MEMEX: Nuk janë prekur të dhënat!

Policia reagon pas raportimeve për hakërimin e sistemit MEMEX: Nuk

Ditën e sotme pati raportime nga mediat se grupi i hakerave të ‘Homeland Justice’ kanë publikuar të dhëna të marra nga MEMEX, sistemi i menaxhimit të të dhënave kriminale.

Në një reagim zyrtar Policia ka deklaruar se MEMEX nuk është hakëruar dhe se të dhënat e publikuara së fundmi nuk ka lidhje me databazën e sistemit policor.

Reagimi i plotë i Policisë së Shtetit: Nga deklarimet e bëra sot në media dhe referimet e këtyre deklarimeve, sipas të cilave janë marrë të dhëna nga sistemi MEMEX, sqarojmë opinionin publik se ky sistem nuk është prekur dhe se këto të dhëna nuk kanë të bëjnë fare me databazën e sistemit policor MEMEX.

Policia e Shtetit njofton se, deri në këto momente, nuk janë prekur apo dëmtuar të dhëna sensitive që administrohen në këtë sistem, të cilat kanë të bëjnë me punën policore.

Policia e Shtetit, në bashkëpunim të ngushtë me partnerët, po heton origjinën e rrjedhjes së këtyre të dhënave dhe apelon që, në zbatim të urdhrit të prokurorit, të datës 19.09.2022, të mos publikohen nga mediat audiovizive, të shkruara, online, në rrjete sociale apo në çdo formë të publikimit apo transferimit, të dhëna që postohen nga autorët e këtij sulmi kibernetik ndaj sistemeve digjitale të Policisë së Shtetit.