Bllokimi i rrugëve, nën hetim 30 protestues dhe 4 deputetë
E Mërkurë 30 Tetor 2024, 09:53
TiranaPost
Pas protestës së djeshme të opozitës, janë vënë nën hetim 30 protestues dhe 4 deputetë të Partisë Demokratike. Më problematiku ishte bllokimi i rrugës te mbikalimi i Kamzës.
Deputetët e proceduar janë Flamur Noka, Albana Vokshi, Xhelal Mziu dhe Asllan Dogjani. Veç bllokimit të rrugës ata akuzohen edhe për kundërshtim të forcave të rendit ndërsa disa nga protestuesit për djegien e gomave.
Opozita protestoi të martë e djeshme në gjashtë akse kryesore të vendit.
Deputetët e opozitës shqiptare ndaluan makinat e tyre në mbikalimin e Kamzës, në hyrje të Tiranës, duke njoftuar zyrtarisht nisjen e protestës, prej orës 17:00 të së martës. E njëjta skenë u përsërit edhe në pesë rrethrrotullime të tjera të vendit, në Shkozet, Bradashesh, Rrogozhinë, Levan dhe Milot, duke sjellë bllokimin e qarkullimit rrugor.
