Te gjithaUrban

Urban, lali Eri dhe Ilir Meta ishin bashkë


Nga “Fatorinoja”/ I lodhur të ecja deri tek stacioni i Unazës, në mëngjes herët marr urbanin e ish-Uzinës së Autotraktorëve. Kur ç’të shikoj, sërish lali Eri. Kishte bërë një xhiro lart e po ulej për poshtë, drejt qendrës. Urbani njerëzit i kishte të pakët.

-Hajde kingo, hip.

I buzëqesha, nuk kisha çfarë të bëja…

-Po shkon në shkollë?

-Jo në punë…

-Mendova nga çanta ndaj…Po pse nuk merr një biçikletë? Me mirë, bën dhe pak stërvitje.

Çfarë t’i ktheja përgjigje? T’i tregoja se një biçikletë kushton sa gjysma e një makine, nuk do më besonte. T’i tregoja që Tirana nuk ka rrugë për biçikleta, do thoshte që do t’i bënte.

-Është pak ftohte tani ndaj. Po na i rregulluat ju urbanët më mirë, do na bënin punë.

-Më falni, ju djali keni abone apo biletë?
-Abone zotëri…

-O lal, po ne po punojmë e shikon ti? Ai i pari vetëm flinte gjumë, ne po punojmë. Çdo gjë në kohën e vetë o lal.

-Punon i miri i nënës, punon! Vetëm punën ka në dorë ky. E kemi më të mirin e Tiranës

Një zonjë e moshuar nuk pushonte duke i puthur dorën.
-Më erdhi stacion të zbres, ju uroj sukses në punën tuaj!

-Një foto, një foto bashkë nuk do e bëjmë?

-Herë tjetër, sot i kam flokët pa rregulluar.

Rastisi mirë, sa zbrita nga një urban, hipa tek tjetri. Unaza ishte plot, nuk merrte ajër. “Eh të ishe këtu more lali Eri”, mendova.

***

Koha e vrenjtur i bën njerëzit si të shushatur. Të gjithë prisnin urbanin. Milet i madh. Pas 15 minutash erdhi firzamonika.

-Hajde se jemi vonë, nxitoni!

-Bir i nënës me ndihmo pak të hipi.

Sistemohem diku në këmbë. Disa shkonin për tek protesta, ishte turni i tyre i pasdites. Abonenë mbaja në dorë, 10 herë kalonte fatorinoja mes urbanit 20 herë kërkonte lekët.

-Do iki Likja o Shyqo?

-Po hëngri ndonjë ngjalë me Bashën, ka mundësi Raqi.

-Syrin ia shkeli Basha dhe Berisha, po tani të shikojmë. Se i vetëm nuk fitojnë dot këta jo, kështu duan.

-Meta di vetëm të haj, sa andej sa këtej. Po nuk besoj, di ai se çfarë luhet.

Një zonjë e shendosh po më shtynte, nuk mbante dot ekuilibrin. Epo bela…

-Zonjë, të lutem se të gjithë në këmbë jemi.

-Ore po Sala është budalla, po nuk e lanë këta. Më tha një komshi mua, po të kishte folur ai do kishte dhunë. Njeri i dhunës është ai.

-Shyqo, iu ka ardhur momenti. Do arrestohen për ato që kanë bërë. Edhe Sala dhe Likja. Boll kanë vjedhur. Dëgjo mua, hajde dil nga darka andej nga mua, thërrasim edhe Ismetin e Gaqon e bëjmë ndonjë domino.

-Ik o Raqi, ik…

-Zonjë, të lutem shtyhu pak se na hipe sipër. Edhe një stacion durova.

(E hënë, 20 Shkurt 2017)

1 Koment