Aktualitet Te gjitha

Sinjali i kanaleve televizive do fikej më 15 janar, por AMA shtyn sërish afatin për këtë arsye


Është shtyrë sërish afati për dixhitalizimin e kanaleve. Autoriteti i Mediave Audiovizive ka njoftuar përmes një statusi në “Facebook” se procesi i mbylljes së transmetimeve analoge në Tiranë, Durrës dhe Vlorë është shtyrë për në muajin shtator.

Pas mbylljes së sinjalit në shtator dhe panikut tek qytetarët AMA reflektoi duke rikthyer sinjalin e kanaleve. AMA deklaroi se sinjali analog i transmetimit do të fiket prapë më 15 janar 2019.

Por duket se ka ndryshuar mendim sërish dhe këtë herë për këtë arsye.

Njoftimi i plotë si më poshtë:

NJOFTIM MBI PROCESIN E DIGJITALIZIMIT TË TRANSMETIMEVE TELEVIZIVE NË QARQET TIRANË E DURRËS SI DHE PËR QARKUN E VLORËS

Autoriteti i Mediave Audiovizive (AMA) njofton se mbyllja e transmetimeve analoge televizive në qarqet Tiranë dhe Durrës parashikuar për në datën 15 janar 2019, shtyhet për në datën 1 Shtator 2019.
Në këto dy qarqe, aktualisht bashkë ekzistojnë të dyja teknologjitë e transmetimit, si ato analoge ashtu edhe ato numerike, kjo metodë simultane transmetimi e cila garanton vazhdimësinë e marrjes së transmetimeve televizive edhe gjatë periudhës tranzitore, do të vijojë deri në datën 1 Shtator 2019.

Kujtojmë se, për familjet tashmë të pajisura me dekoder, vijojnë transmetimet digjitale tokësore të cilat sigurojnë cilësi të lartë në 36 kanale televizive pa pagesë.
AMA mban në konsideratë se në qarqet Tiranë dhe Durrës është përqendruar numri më i madh i banorëve dhe evidentohet, bazuar në të dhënat e deritanishme nga operatorët ekonomikë tregtarë, se ende nuk është siguruar sasia e mjaftueshme e dekoderave të tipit DVB-T2. Gjithashtu, duke mbajtur parasysh vendimin nr. 547/2018 të Autoritetit të Konkurrencës, që rekomandon rritjen e sensibilizimit ndaj opinionit publik, për qarqet e Tiranës dhe Durrësit, por edhe në qarqet në vijim ku pritet të ndodhë digjitalizimi, AMA vijon punën për përmirësimin e fushatës informuese për publikun, përfshirë edhe ndryshimin e përmbajtjes së spoteve informuese, njoftimeve, apo zgjerimin e kanaleve të komunikimit.

Kuadri ligjor që normon procesin e digjitalizimit kërkon domosdoshmërisht pajisjen e plotë të audiencës me marrës numerikë, ose dekodera, në mënyrë që të garantohet vazhdimësia e marrjes së transmetimeve televizive edhe gjatë kësaj periudhe tranzitore.

Për këtë qëllim, AMA vijon të nxisë operatorët e tregut që të sigurojnë sasinë e mjaftueshme të këtyre pajisjeve, me qëllim finalizimin e këtij objektivi në qarqet Tiranë dhe Durrës.
Ndërkohë, AMA po finalizon zbatimin e procesit të digjitalizimit të transmetimeve televizive edhe në qarkun e Vlorës, ku është i njëjti afat i mbylljes së sinjalit analog, 1 Shtator 2019. Edhe në këtë qark janë ndezur transmetimet numerike të operatorit publik dhe të disa prej atyre private kombëtare, prej të cilave ofrohet rreth dyfishi i kanaleve televizive pa pagesë, për ato familje që janë pajisur me dekoder DVB-T2.

Autoriteti i Mediave Audiovizive
11 Janar 2019./ E.D – Copyright Tiranapost.al

Reflekton AMA pas panikut të qytetarëve. Nëse nuk e ke blerë ende dekoderin, ke kohë në dispozicion edhe 4 muaj

Nuk është nevoja të bëni abonime çdo muaj. Ja ku mund të gjeni dekoderin e duhur