Ndërron jetë ‘Syri i Stambollit’! Foto-reporteri që i tregoi botës një tjetër Turqi
Një nga foto-reporterët më të mirë të Turqisë, Ara Guler ka ndërruar jetë në moshën 90 vjeç. Me pseudonimin ‘Syri i Stambollit’ Ara Guler realizonte foto melankolike, më së shumti bardhë e zi me aparatin 'Leica' përgjatë Stambollit, por jo vetëm.
Ai ndërroi jetë në spital mbrëmë pasi vuante nga problemet me zemrën. Guler lindi nga prindër armenë, ai e filloi karrierën si fotograf në një redaksi gazete turke dhe në vitet 1950 u emërua si korrespondent i revistës Time-Life pranë Near East. Ai ka takuar fotografë të famshëm si Marc Riboud dhe Henri Cartier-Bresson, të cilët e ndihmuan të bëhej pjesë e agjencisë së njohur të fotografisë Magnum.
Fotografitë e tij përcollën fytyrën e ndryshimit të Stambollit me monumentet më të njohura të saj, si dhe imazhet e njerëzve në rutinën e tyre të përditshme. Puna e tij u përhap shpejt nëpër botë. ‘Njerëzit më quajnë fotograf i Stambollit, por unë jam një qytetar i botës. Unë jam një fotograf botëror’, thoshte dikur Ara Guler. Guler fotografoi shumë figura botërore duke përfshirë udhëheqësin britanik të kohës së luftës Winston Churchill; Indira Gandhi; filozofin Bertrand Russell; regjisorin Alfred Hitchcock dhe artistin Pablo Picasso.
Stamboll, 1960
Guler fotografoi edhe Presidentin turk Rexhep Tajip Erdogan në vitin 2015. Presidenti kontaktoi familjen e fotografit për të shprehur ngushëllimet e tij dhe tha se Guler do të kujtohej gjithmonë për punën e tij. Këtë vit u hap një muze me fotografi në emër të Guler në Stamboll për të shënuar 90 vjetorin e fotografit./ BBC/ Tiranapost.al