Aktualitet

Grabitja në Rinas/ Detaje për katër të arrestuarit, policia siguron prova të shumta

Grabitja në Rinas/ Detaje për katër të arrestuarit, policia

Policia e Shtetit ka përditësuar informacionin për grabitjen e parave në aeroportin e Rinasit, të ndodhur me datë 9 prill. Në njoftimin zyrtar, policia njofton se katër persona kanë përfunduar në pranga dhe dyshohet se mund të jenë autorë të përfshirë në grabitje. Rezulton se tre prej tyre janë banues në Elbasan, njëri prej tyre me banim të përkohshëm në Tiranë dhe i katërti banues në Krujë. Mësohet se gjatë operacionit për ndalimin e tyre janë përdorur teknika speciale hetimore dhe janë përfshirë strukturat operacionale të Drejtorisë së Përgjithshme të Policisë së Shtetit, të Drejtorive Vendore të Policisë Tiranë, Elbasan dhe Durrës.

Njoftimi zyrtar i policisë si më poshtë: 

Tiranë

Vazhdon veprimtaria hetimore për zbardhjen e plotë të ngjarjes së ndodhur më datë 9 prill në Rinas. Në pranga katër persona si autorë të dyshuar të përfshirë në këtë ngjarje.

Në vijim të veprimeve të kryera nga një grup i posaçëm hetimor me Specialistët më të mirë të Hetimit të Drejtorisë Vendore të Policisë Tiranë dhe të Drejtorisë së Përgjithshme të Policisë së Shtetit nën drejtimin e Prokurorisë për Krime të Rënda, për zbardhjen e ngjarjen së datës 09.04.2019, ku janë vjedhur me armë një sasi e kosiderueshme vlerash monetare në aeroportin e Rinasit dhe mbeti i vrarë një nga autorët e kësaj ngjarje shtetasi Admir Murataj, ju informojmë se:

Grupi i Posaçëm Hetimor nën drejtimin e Prokurorisë pranë Gjykatës së Shkallës së Parë për Krime të Rënda, në bazë të veprimeve hetimore të kryera dhe informacioneve të marra në rrugë operative, si dhe provave të siguruara gjatë hetimit është bërë i mundur ndalimi i katër autorëve të dyshuar si të përfshirë në këtë ngjarje dhe konkretisht:

• O. V., 38 vjeç, banues në Krujë;

• A. B., 34 vjeç, banues në Elbasan, me banim të përkoheshem në Tiranë, i dënuar më parë për "Prodhim dhe shitje narkotikësh";

• R. S., 25 vjeç, lindur dhe banues në Elbasan;

• S. Ç. 28 vjeç, lindur në Kajan Elbasan dhe banues në Elbasan.

Gjatë operacionit për ndalimin e këtyre shtetasve janë përdorur teknika speciale hetimore dhe janë përfshirë strukturat operacionale të Drejtorisë së Përgjithshme të Policisë së Shtetit, të Drejtorive Vendore të Policisë Tiranë, Elbasan dhe Durrës.

Gjithashtu gjatë kontrolleve janë gjetur dhe sekuestruar në cilësinë e provës materiale, prova të shumta të cilat do të shërbejnë për thellimin e hetimeve dhe zbardhjen e plotë të ngjarjes.

Materialet proceduriale në ngarkim të tyre i kaluan Prokurorisë Pranë Gjykatës së Shkallës së Parë për Krime të Rënda Tiranë për veprën penale të “Vjedhjes me armë të kryer në bashkëpunim” në kuadër të "Grupit të Strukturuar Kriminal", ”Mbajtjes pa leje e armëve dhe municioneve luftarake” "Vrasje e Punonjësve të Policisë e kryer në bashkëpunim e mbetur në tentativë”./ Copyright/ Tiranapost.al. E.B

http://www.tiranapost.al/pronari-i-servisit-ku-u-modifikua-furgoni-i-grabitjes-se-rinasit-ja-kujt-ja-dhashe-me-qira/