Aktualitet

Agron Duka nuk e fsheh zhgënjimin: Më falni që u bashkova me Bashën

Kryetari i Partisë Agrare Ambjentaliste Agron Duka i cili në zgjedhjet parlamentare kandidoi në siglën e PD, duke mos arritur të fitojë mandatin e deputetit ka folur për perspektivën e të ardhmes të formacionit politik që tashmë drejton për dy vitet e fundit pas shkëputjes së tij nga Partia Republikane.

Në një letër të hapur drejtuar anëtarësisë së PAA, Duka ka thënë se vendimi për të mos garuar të vetëm, por në siglën e PD ka qenë një gabim dhe se përgjegjësia për këtë vendim të gabuar e mban vetë ai. Duka ka thënë se nuk do të heqë dorë nga projekti i tij dhe se PAA është parti e vjetër që do të vazhdojë të punojë, pavarësisht se nuk është e përfaqësuar në parlament.

Letra e plotë e Agron Dukës:

Të nderuar anëtarë dhe simpatizantë të Partisë Agrare Ambientaliste!

Pas një periudhe të nevojshme reflektimi, mendoj që disa gjëra dhe paqartësi duhen sqaruar për të ardhmen e kësaj force politike .

Së pari dua ti drejtohem atyre që më pyesin nëpërmjet mesazheve nëse do vazhdojmë të punojmë si PAA apo si rezultat i marrëveshjes

Basha – Rama, nuk do të ketë më parti të vogla dhe si pasojë do të shkrihemi me PD.

PAA është një parti e vjetër në skenën politike shqiptare e cila ka lindur si përfaqësuese e banorëve të zonave rurale, për ti dhënë rrugë zgjidhjeve problemeve të shumta që ka bujqësia dhe blektoria. Ajo ka në programin e saj gjithashtu çështjet e agroindustrisë dhe mjedisit dhe të gjitha këto çështje, unë mendoj që më mirë se PAA nuk mund ti trajojë asnjë parti tjetër, sepse ajo ka në gjirin e saj specialistët më të mirë të këtyre fushave.

Janë bërë edhe në të shkuarën përpjekje për të asimiluar partitë e vogla por ata gjithmonë kanë dështuar.

Duke e parë në këtë këndvështrim, megjithë rezultatin negativ të zgjedhjeve parlamentare, ne nuk kemi pse vëmë në dyshim egzistencën dhe misionin e PAA-së për të ardhmen. PAA nuk u provua duke konkuruar më vete, por në kushtet e krijuara pas marrëveshjes së dy forcave të mëdha politike, kandidatët tanë si dhe strukturat e PAA punuan shume në fushatën elektorale në vazhdimësi të punës të filluar që prej një viti, por duke qënë në siglën e PD, puna e tyre nuk pati asnjë mundësi që të dilte në pah e si pasojë, nuk mundëm të siguronim asnjë përfaqësues në parlament për katër vitet e ardhëshme.

Me këte rast dua të falenderoj z. Adi Haxhiymeri, z. Olsi Cukaj,

z. Edmond Biçoku, z. Bujar Huqi dhe të gjithë ata që punuan e kontribuan në këtë fushatë elektorale .

Vendimi për të mos konkuruar vetëm, ishte një vendim që u mor në konsultë me strukturat e PAA, ku shumica prej tyre duke menduar që nuk kishim numërues e komisioner dhe duke qënë se numri i votave të nevojshme për një mandat rritej shumë, gjykuan se dalja më vete na penalizonte shumë dhe fatkeqēsisht ky vendim rezultoi i gabuar. Si rezultat përgjegjesia kryesore në raste te tilla bie mbi Kryetarin dhe për këtë, do të diskutojmë në mbledhjen më të afërt të forumeve .

Së dyti pati edhe nga ata të cilët kandidimin në siglën e PD nuk e përkrahën dhe si pasojë ose nuk erdhën fare në fushatë duke shprehur hapur disaprovimin e tyre, ose punuan pa impenjimin maksimal.

Unë mendoj që këta persona, të cilët më parë kishin dhënë kontributin e tyre me shumë devotshmëri në ringritjen e strukturave të PAA në fushatên për zgjedhjet e pjesëshme nê Kolonjë ..etj nuk kanë përse tërhiqen nga jeta politike pranë PAA, por të vazhdojnë të japin kontributin e tyre, sepse ne humbëm një betejë por jo luftën për zgjidhjen e çështjeve për të cilën egziston kjo parti.

Me respekt!

Agron Duka

K.H/ tiranapost.al