A kishte vërtet prova prokuroria?
Prokuroria e Krimeve të Rënda ka reaguar sot nëpërmjet një deklarate për shtyp duke thënë se anëtarët e Këshillit të Mandateve, megjithëse kanë nënshkruar një deklaratë për ruajtjen e sekretit hetimor, kanë nxjerrë në media prova të ndryshme të procesit “Habilaj” ku pretendohet se është i përfshirë edhe deputeti Saimir Tahiri.
Por, a ka pasur realisht prova?
Përgjimet e grupit të Habilajve ku përmendej edhe emri i Saimir Tahirit ishin publikuar në media përpara se të zhvillohej mbledhja e parë e Këshillit të Mandateve ditën e premte.
Gjithashtu edhe lëvizjet e Saimir Tahirit me makinën që i kishte shitur Artan Habilajt u publikuan përpara se të zhvillohej kjo mbledhje e për më tepër Tahiri e pranoi në studion e emisionit “Opinion”.
Duket se prova e vetme që dekonspiroi në media sot është se ekziston dëshmia e një polici (ose policeje femër) që ka deklaruar se Habilajt i kishin thënë se Saimir Tahiri ishte kushëriri i tyre.
Ndërkohë që në deklaratën e prokurorisë, bie në sy që nuk ka asnjë fjalë të vetme për videon e publikuar nga Sali Berisha të aksionit në Babicë të Vlorës ku u sekuestruan 4 ton drogë. Gjithashtu asnjë fjalë se si dosja “Habilaj” shkoi më shpejt në tryezën e Lulzim Bashës, se sa në selinë e Kuvendit. E për më tepër, se si shpjegohet që Gent Strazimiri kishte në mbledhjen e ditës së premte informacion konfidencial të prokurorisë?
Pra të gjitha këto fakte, të bëjnë të shtrosh pyetjen se a ka pasur vërtetë prova, apo prokuroria po kërkon të justifikojë veten pas “blofit” në Këshillin e Mandateve?/Tiranapost.al